立法會選舉提名期周五結束，呢屆地區直選爭崩頭，仲要唔止泛民同本土派搶票，建制內亦有新興勢力同門相鬥。而阿爺力保民建聯同工聯會親生仔選情外，契仔契女嘅選情，梗係同樣關心，除咗向來嘅愛將九龍東謝偉俊同九龍西梁美芬，今屆新界東同西都同樣有盛傳嘅西環新契仔及女冒起，同樣嚟自法律界，原來西環對法治，咁重視㗎？
成新界東西黑馬
喺新界西出選嘅律師何君堯，舊年區選撼低民主黨何俊仁成為功績，深獲西環器重，今次再戰西環點會唔支持？有別於民建聯同工聯會，佢以律師形象攞中間偏藍支持，所以地面人海戰勁過其餘兩個愛國陣營參選人，而佢高調反佔中，預料獲部份激進左派支持，喺民建聯只出兩條隊而泛民分票下，被視為爆冷黑馬。
至於新界東，就由政齡極淺嘅大律師容海恩以新民黨招牌出戰，年初先入黨，就獲高調力捧，真係冇後台？政績未見，相貌行先，賣嘅係形象同新鮮感，加上同新民黨合併嘅公民力量力谷、兼夾有啲唔妥民建聯但又同侯志強唔啱嘅鄉事票支持，亦成爆冷之選，尤其新界東非建制名單好多，最後一兩席或稍稍贏人少少就可以得米！
無論呢兩位西環新愛將跑唔跑出，都睇到西環選舉新套路，明顯對法律界情有獨鍾，唔通因為梁美芬同謝偉俊係律師又掂咗，覺得可以照此複製？而代表民建聯選超級議席嘅周浩鼎，年紀輕輕就極速上位，據知同佢嘅律師專業背景都有關，睇嚟要獲西環關照，做律師都係捷徑喎！
花生友
周二、四刊出