選舉前夕，軟銷係好正常，好似財政司司長曾俊華咁，接受電台訪問時又再話當年，自爆若非爸爸當年堅持移民美國，自己唔會有機會入讀當地嘅好學校，自爆那些年一度學壞，甚至同當地童黨為伍，最終因為好友嘅不幸經歷令佢醒覺，希望憑知識改變命運，考到獎學金入讀麻省理工學院喎！
喺喇沙小學同中學讀書嘅鬍鬚曾接受商台《雲常開》訪問時自稱唔係好學生，「未試過考第一，考第四我都會好開心，因為我都未試過」，若非13、14歲時移民美國，肯肯定入唔到大學。
佢話當年英文程度有限，住喺紐約貧民區，鄰居都係南美新移民。中學放學後就同年紀相若朋友喺唐人街四處惹事生非，童黨中「有啲入咗幫派、有啲死咗、有啲坐監，當然亦有人好成功」。
點解冇誤入歧途？佢話有個好友喺一次活動中俾人開槍射中腰間癱瘓，接受唔到自己癱咗而自殺，因此鬍鬚曾發憤圖強讀書，考入成績唔錯嘅高中，仲同美國首位黑人司法部長霍爾德（Eric Holder）做同學。
500本藏書未睇晒
鬍鬚曾噚日亦到書展同年輕人分享閱讀習慣，透露俾太太禁止買書，因為佢忙於睇文件同處理公務，𠵱家仲有近500本書未睇。
佢最近睇緊台灣作家鄭丰嘅網上連載小說《多情浪子癡情俠》，仲推介《Thread of the Silkworm》（《中國導彈之父——錢學森之謎》）畀年輕人，其間不停有年輕人同佢selfie，好受歡迎喎！