內地嬰兒用品商好孩子國際（1086）上月中股價插水，相關傳聞多多，有說公司調低生意目標，又有傳只係行政總裁Martin Pos要沽貨交稅，事隔一個多月，公司可能要表明發展決心，噚晚公佈委任社交分析公司Socialbakers創辦人Jan Rezab做執董，兼任數字科技行政總裁。
Rezab只得29歲，佢創辦嘅Socialbakers現有2,500名客戶，根據公司網頁，聯想（992）、雀巢、Toyota都有幫襯，Rezab亦入選美國《福布斯》「30 Under 30」榜單。佢加入好孩子國際後，將負責集團BOOM策略數字技術，整合線上到線下商業模式，並利用移動通訊設備推廣品牌。雖然唔知呢位哥哥仔掂唔掂，但淨係請佢呢個舉動，已經令到成間公司忽然潮晒！