是咁的，今日香港版Pokémon Go終於有得玩，記者同一班同事都唔執輸，即刻趁食飯時間行勻全公司起勢捉！捉咗一個鐘，果籽就發現咗四招，今次不藏私一齊開心share等各位入門訓練員更快上手。
一、放棄首三隻小精靈換比卡超
唔好意思，仲係未改到口叫佢做「寶可夢」。回歸正題，首次開app訓練員附近會有三隻小精靈，大部份人都見到奇異種子、小火龍同車厘龜，網上流傳只要唔捉佢地，改為喺附近行多兩個圈就會見到比卡超。我哋兩位同事實試過，果然冇捉頭三隻既同事就捉到比卡超，另一位見都見唔到！
二、噴香水引小精靈
行極身邊都唔見有小精靈？按實精靈球icon，喺「items」就會見到唔同道具，用香水「Incense」就可以更容易吸引小精靈去你身邊，不過每次效力只得30分鐘時間，動作要快呀小智！
三、留意腳印同樹葉搵小精靈
地圖上方圓百里都唔見有佢地蹤影？其實右下角有個小視窗，以小腳印顯示小精靈同你所在距離的遠近。3個腳印為1公里內、2個腳印為100米內、1個腳印為10米內，如果冇腳印而有暗影？恭喜你，目標就喺你附近咋！同時亦可以留意訓練員身旁綠色樹葉位置，多數暗示咗向邊個方向行會有小精靈。
四、對準綠圈更易捕捉
初初開始捉小精靈，就算精靈球只係輕輕掂到目標就已經容易收服，但越玩得耐，目標CP值越高就越難捕捉，就算精靈球捉到都可能會俾佢逃走；記者捉蚊香蛙時更加俾佢走甩。想準繩度高啲，對準目標時不妨好似平時影相對焦咁按一按，見到綠、橙、紅色圈先掟精靈球去顏色圈位置，會更易成功。
記者：黃樂雯
