現年36歲嘅關心妍（Jade）大前日升呢做人母，為老公楊長智誕下小公主楊榮心（Jovia），小公主眼睛形狀好長，應該係大眼妹，佢打呵欠時仲擘到個嘴仔好大，O形嘴超可愛。
初為人母嘅Jade噚日接受訪問時好開心咁話：「BB中文名叫楊榮心，我哋跟族譜榮字改，代表榮耀同有神嘅心，英文名大家都想用番J字，所以叫Jovia，代表joyful、開心，希望佢係一個喜樂BB，佢出世6磅6，身長48cm，佢剛出世時似我多啲，𠵱家似爹哋，好多頭髮好得意，我諗佢係最快要剪頭髮嘅BB。」
傷口少少痛
第一胎選擇剖腹嘅Jade話：「一切都OK，之後有少少痛，都頂到。」老公楊長智都有陪佢入產房：「佢係緊張大師，都驚佢入到產房會手忙腳亂，點知佢異常冷靜，我真係要頒個獎畀佢，仲可以剪埋臍帶，雖然我瞓咗喺度，但感覺有少少眼淚。」為咗囡囡嘅健康，Jade堅持餵全母乳：「好多人話初乳好緊要，但因為開頭好少初乳，餵嘅次數好頻密，要十至十二次，好在之前有上堂，已經好OK，BB又好乖識搵食，好容易大家就配合到，佢都食咗好多，餵母乳感覺好amazing。」
撰文：馮仁昭
