【驗樓直擊】
市建局啟德煥然壹居入伙，經歷樓市短暫下跌，折扣重回八折水平，上周資深驗樓師詹濟南弟子阿剛驗收一個兩房單位，稱「單位唔錯，三大要害，『樸』批盪、空心磚、漏水都冇」，評分70分，質素拍得住私樓，如大角嘴浪澄灣貨尾。
煥然壹居鄰近未來沙中線啟德站，記者由彩虹站徒步而行約15分鐘，屋苑現時靠小巴及巴士往來九龍灣或黃大仙港鐵站。本報邀請資深驗樓師詹濟南「詹sir」徒弟阿剛驗收一個兩房戶，實用449方呎，業主今年以約511萬元買入。甫入單位，雖說是市價八折的資助房，但感覺不像，猶如私樓，單位享少海景，前臨中海外（688）「港人港樓」啟德一號。
阿剛表示：「單位唔錯，三大要害，『樸』批盪、空心磚、漏水都冇，空心磚只在無所謂嘅位置（露台去水口旁）。」惟客廳地台傾斜，水平呎圍繞客廳度一圈，發現地台傾斜超出3毫米標準，放置傢俬將搖擺不定，細房地台斜得更嚴重，五蚊銀放角落，斜到自行轆落。他建議，業主可要求發展商重鋪地台，不過有利有弊，因地板入榫接合，剷起部份重裝，普遍以膠水縫合，惟膠水日耐會脫落，地板將繞起，業主若不介意傢俬腳攝銀仔，建議不重鋪。
浴室外牆未鋪好
另外，浴缸去水位殘留大量沙石塞去水口，應要求發展商派員清理，否則容易塞喉；浴室冷氣機外牆未鋪好，現一個大窿，遇大雨會入水。阿剛還指，單位油漆多處不平滑及污漬，扣一半分，客廳氣窗不貼框、還有兩處防水膠有窿成為日後滲水溫床亦要扣分，七除八扣，總分70分，但拍得住私樓。
