【尋找首爾的香港】「我請在...座各位見證...」韓籍新郎看着寫在手上的韓文拼音，用唔咸唔淡的廣東話讀出結婚誓詞，希望在場每一位都聽得明白，他對香港太太的承諾。
早前，本報節目《三個粉絲追韓劇》訪問了一對港韓準新人，26歲港女鍾愛虹(Vivian)和30歲韓男安貴煥(Peter)，二人隨《太陽的後裔》熱潮，穿上軍服影婚紗相。上月，他們正式在香港紅棉路婚姻登記處註冊，榮升安生安太。Vivian甜笑地指，「噚晚先教佢用廣東話讀誓詞！」貼心的Peter話，想太太的親友有親切感，所以用廣東話宣誓。
Vivian和Peter的愛情故事要由三年前講起，二人透過韓國交友App認識，Vivian竟然膽粗粗，自己飛去韓國見Peter！Vivian話：「嗰時諗住去旅行，順便見面，結果全程都同Peter一齊四圍玩。」但Vivian覺得始終二人分隔兩地，當時並不打算與Peter發展。然而，窩心的Peter親手製作了一本相簿，貼滿他們四圍玩的相片，寄到香港給Vivian，當然成功打動芳心！
心，先飛到韓國；人，隨後亦飛去working holiday，享受與Peter的二人世界。Vivian媽媽話，「佢初初去韓國，我都唔知喊咗幾耐！」原來父母起初都反對Vivian嫁去韓國，認為當地落後，只有泡菜食，直至見過Peter真人，感受到他的真心才改觀，註冊當日更大讚女婿：「鍾意佢靚仔囉！鍾意佢有禮貌囉！」
Vivian大家姐JoJo分享第一次見Peter的印象，「原來韓國人真係單眼皮！」她指媽媽很緊張Vivian，直接問Peter：「你係咪真係鍾意我個女o架？」Peter立即用身體語言做大心心，父母才放心！大家姐還分享一件趣事，指Peter吃飯時會很自然夾餸餵家人，「唔知係咪韓國人嘅習慣，又餵爸爸，又餵媽媽，仲好熱情咁餵埋嚟我到，我都唔好意思推，就照食，不過感覺怪怪地！」Vivian的朋友Jerry和 Dorothy都大讚Peter體貼，Jerry話：「我係男仔，Peter都會夾餸畀我，仲夾畀Dorothy老公。」Dorothy即笑着插嘴話：「係呀，Peter仲話我，點解我唔夾餸畀我老公！」
不少港人都希望逃離香港，去年就有約7000人移民，比前年多100人。Vivian都一樣，在香港和韓國之間，選擇了定居韓國。除了「天氣好啲、住屋大啲、生活費平啲、儲錢都易啲」這些原因，更因為Peter一年前辭掉工作，與Vivian的朋友合資在弘大開民宿「MONO HOUSE」，目前已經開第二間分店，業績理想，月賺約五至六萬港元。Peter因為遇上Vivian，由打工仔變老闆，開托事業新領域，但Vivian笑言不覺得自己旺夫，只是機緣巧合，但Peter就公開多謝老婆，更表示「我會將佢變成世界上最幸福嘅女人！」肉麻死人喇！
記者：鄒倩婷
攝影：廖達燊、Neo
編導：陳家文