八方相當年：
宅男項明生怕蛤乸 - 李八方

做得旅遊達人，當然拎住背囊就起行，冇理由係少膽蟲？但項明生James卻同八方講，細個時其實細膽到暈，試過有次湊大佢嘅外婆叫佢出去叫阿哥返屋企食飯，點知當時幾歲大嘅佢喺馬路中間見到一隻蛤乸，「我叫佢行開，佢唔理，我好驚，咪跑返屋企，仲向阿婆講大話，話叫咗阿哥嘞，佢唔肯返嚟……查實都冇去到！」

靠煲劇學廣東話

現年46歲嘅James話隔咗好耐之後有同婆婆講番自己講咗個大話。除咗細膽，佢成日俾阿哥蝦，形容幼時係宅男，鍾意匿喺屋企做家務，又或者喺花園執樹葉畀屋企人燻肉。
1986年佢16歲時由內地移居香港，「當時係中四插班生，完全唔識聽廣東話」，當時會將雞髀讀做基髀，由於讀嚟讀去都讀唔到麥精個麥字，「搞到嗰時只敢飲維他奶，因為我讀到」。
佢話嗰時都有唔少人歧視新移民，覺得佢係大陸仔，但都有啲好同學，「有啲女同學仲教我打呔，好warm！」
James當年靠煲無綫電視劇學廣東話，好似熱播嘅《流氓大亨》同重播嘅《網中人》，好在廣東話唔正冇影響學習，而佢中六中七真係死讀書，最終以優異成績獲港大文學院收錄，「當年港大好少內地同學，我真係異數」。James大學生涯刻意玩番夠本，莊都上咗幾個，之後嘅人生旅程，都算幾順利吓。