有「抽水大王」之稱嘅永義國際（1218）前主席官永義，佢女兒官可欣早於2010年加入永義做執行董事，近年仲親力親為幫手賣樓。不過睇番永義最新年報，唔知乜事，太子女被減薪25%，總年薪由65.5萬元，跌到得番49.2萬元，除開12個月，即係每個月得4.1萬蚊。
4萬蚊一個月，對普通打工仔可能好多，但對於太子女，可能唔夠佢買衫買化妝品喎。不過官可欣今年只得31歲，相信加入爸爸公司都係想攞多啲實戰經驗，跟住媽媽兼副主席雷玉珠，仲有一班老臣子學多啲，等將來接班時更易上手啫，表面人工都係象徵式。
官可欣都算乖，好似舊年市場新盤大戰時，佢都成日去旗下何文田新盤幫手推盤，十分落力。講番轉頭，今年雷玉珠就大幅加薪嘞，總年薪加近3倍，袋近2,200萬元。