順風車的概念在外國非常流行，但在香港並不常見，除了「大埔街坊泥鯭」，真係未聽過香港有免費順風車搭，以為唔係大埔友就冇得坐？最近就有個在新加坡很紅的順風車app RYDE登錄香港，鼓勵司機義載順路的乘客，環保之餘又可以識新朋友，今次記者就實試究竟work唔work。
「喺香港唔係好多人願意去做呢件事，香港人好忙，唔係個個都好似我咁，成日都咁得閒車人。」坐在我身旁的Windy，帶着黑超，望落有幾分似劉以達，正職是跆拳道老師，以教班為生。因為上班時間彈性，而且不時要自己揸車往返港九新界，所以便透過這個app，免費義載順路的人去目的地。
透過RYDE去配對同路人，除了上載身份證明文件去獲得認證，更要上載相片，所以司機和乘客都可以預先見到對方的樣子。以為靚女實好多人爭住載，Windy就說：「其實冇乜關係，最緊要都係順路，我載過男亦載過女，其實都係志在識吓人。」他說平時經常見到有很多order冇人接，的確，記者在這次成功配對之前，傳送超過十次請求都係冇人理。
冇辦法，根據香港法例，私家車要有出租汽車許可證才取酬載客，否則即屬達法，所以載人係唔收得錢。冇錢賺就自然少人做，但Windy都堅持幫得就幫，原因好簡單，「呢個世界你唔做好人，咪冇人做囉。」除了會吉個位出來兜同路人，上車後Windy仲會貼心地俾枝水你，香港地，真係唔係吓吓都講錢。
不過仍有不少人都對這類共乘方式有保留，除了怕遇到壞人，更害怕觸犯法律，大律梁永鏗指，在香港只要私家車司機在載客期間中不收取任何金錢，和過程不涉及商業行為，並不違法。雖然司機唔收得錢，但為了表達謝意，今次我專登買了一杯咖啡給司機。司機一看到是咖啡，立刻雙手合十，以為他太感動，怎料他卻說：「唔好意思呀，我唔飲咖啡架。」……吓？
所以說，現實往往是殘酷。由銅鑼灣搭地鐵或者叮叮來北角不用五蚊，而我買這杯咖啡已經用了三十幾蚊，不過都叫做交咗個朋友。呢個經歷，都值嘅。
記者：陳倢
攝影：梁志永