隔牆有耳:政界四圍撲做Pokémon訓練員 鼠王芬潮捉鼠精靈 - 李八方

隔牆有耳:政界四圍撲做Pokémon訓練員 
鼠王芬潮捉鼠精靈 - 李八方

噚日明明係星期一,辦公室內卻罕有朝氣勃勃,個個員工走嚟走去,好忙碌咁「工作」。係呀,真係好落力㗎,不過佢哋係捉緊小精靈,皆因Pokémon Go殺到香港,潮人梗係要試玩,就連政界中人都係咁話,暫時放低拉票工作四圍撲,而且好滿足佢哋嘅收穫!

梁美芬捉到小哥達,不負鼠王之名。

范國威捉精靈底線係唔會捉到入主席房。

張國鈞走入圖畀大家捉,想要邊個?

企鵝男化身小精靈

好似因為鄭家富復出,喺新東選情有危機嘅新民主同盟范國威咁吖,噚日中午已經喺fb圖文並茂話:「我竟然在立法會辦公室發現小火龍」,似乎捉得好過癮!八方問佢有乜心得?佢話一定要睇路,唔好撞牆,而佢捉精靈都有底線,一嚟唔會捉到衝入主席房,二嚟捉一陣就落街開站,做番選舉老本行。
喺九龍西爭取連任嘅經民聯梁美芬,估唔到都追上呢個熱潮,仲要自抽鼠王芬外號,喺fb貼相留言「識捉一定係捉小哥達」,hashtag「鼠王係捉鼠專家」、「唔係鼠中之王」等。八方問過梁美芬,佢話係一班年輕義工教佢玩㗎!咁有冇捉鼠秘技?都係嗰句,玩還玩,記住睇路唔好撞板!
喺港島參選嘅民建聯張國鈞嫌捉精靈唔夠勁,索性走入圖中畀大家任捉(定joke?),旁邊仲有好多企鵝,明顯攞自己企鵝男花名嚟笑。佢話係助理幫佢P圖,仲叫佢唱埋歌主題曲「日日(夜)鍛鍊(煉)去取勝」,似乎佢真係放低咗企鵝男嘅心魔喎!

李八方

mailto:[email protected]