還未看過剛離任嘅美國駐港澳總領事夏千福個神級告別video？咁唔該即刻睇睇，你做公關、marcom都咁後知後覺，幫你唔到喇。
其實人哋仲有個終極告別post，今次玩嘅係「阿飛正傳」嘅超經典朝偉梳頭scene，冇睇過阿飛正傳，冇被朝偉這震撼一幕掀動過嘅，也許不能感受到Mary嘅五體投地。咁多年來一直認為，就這一幕，即使阿飛拍不成續集，朝偉應該無憾。
講番千福BB，老實講，初來時還稍嫌他build personal brand build得太刻意。街頭小吃、風土民情那些，很有肥彭影子就是了。沒想到幾年下來，真的和香港網民打成一片，像網民說的，比特首更像特首，比所有政客都更懂收買網民的心。
去到告別video，真係不得了，作為香港人，你無法不深深感動。原來世道紛擾、前路茫茫之際，蒼白寂寥的生活裏，你還有一知心友，對你經歷過的黃金歲月，瞭如指掌。而他，堂堂大國領事，全程廣東話，扮鬼扮馬，以此氹你開心，你的心唔溶化，都即刻寫個「服」字。
喂，你問下疑似跑特首馬仔嗰幾位吖，佢哋同和佢哋嘅團隊，有邊位講得出「月光寶盒」和「仙履奇緣」的分別？有多少人知道明將和夏千福的「壽司外交」？又有誰真懂得欣賞朝偉在閣樓梳頭那段扣人心弦的的千古懸案？
千福BB或美國領事的fb中文用的是廣東話，地地道道的香港風情，抓緊的是香港脈搏，題材貼地如雙曾的fb都擺脫不了白話文，可見千福BB的社媒團隊走得有多前。幾時，特首辦或中聯辦才懂得和網民說句：「塵世間最痛苦嘅事，莫過於此……」
彭瑪莉
mailto:[email protected]