中環在線:股民捉精靈 冇人理U盤 - 李華華

中環在線:股民捉精靈 冇人理U盤 - 李華華

港交所(388)嘅新猷成日俾市場柴台,噚日捲土重來嘅收市競價(U盤),夾都冇咁啱,撞正《Pokémon GO》殺入香港。港交所行政總裁李小加今次真係擇啱日子嘞,事關股民掛住捉精靈,都冇乜人玩U盤,冇出事機會喇。
U盤首次推出喺2009年發生過意外,大笨象滙控(005)被質低至33蚊,今次重推自然嚴陣以待。點知中午收市前《Pokémon GO》上架,連一眾股評人都變身小精靈訓練員,股民自然更加無心情炒股,仲理你多咗10分鐘trade咩?
結果成個競價時段都係得11億銀成交,未見有驚天地泣鬼神嘅盤,係騰訊(700)高收1蚊。港交所位於將軍澳工業邨嘅數據中心好似都係PokéStop。唔知一班訓練員會否山長水遠去Catch'em all呢?