日圓呢年幾跌咗咁多，英鎊又跌埋，費清都好少幫趁淘寶。最近想買切麵包架，市面舖頭賣80幾蚊，覺得唔抵，因為都唔係咩高科技，所以咪試吓淘。
順便淘埋其他嘢，運輸方法除咗店家直送、集運，仲有「淘寶直送」。最後決定試吓淘寶直送，輸入香港地址計算費運，列明「內地運費0人民幣，香港運費13人民幣」。睇曬付款版面都冇列明要附加費，所以就付款。
貨物周五到香港，當時費清出咗街，但運輸公司打電話嚟：「你要畀多30蚊附加費喎」。吓！？最慘係費清本託大堂保安代收，保安點會畀呢30蚊呢。擾攘一陣，費清要跑去ATM過數30蚊畀運輸公司，件貨先送到。
費清之前都試過用直送，如託店家用順豐速遞去屋企，對方會講明送住宅收附加費，但費清再去淘寶睇，淘寶直送運費冇列明要收附加費。費清同運輸公司理論時，對方都好坦白：「淘寶唔知搞乜，寫得唔清唔楚，好多客都投訴呀！」
費清打去淘寶剷佢，對方一聽已經話：「呢個問題我哋都注意到，會跟進吓點改善，或者會付款時列明送住宅要收附加費」。費清建議最好連附加費都可以喺網上畀埋，唔使顧客喺屋企等畀呢30蚊。
費清＃要生計，也要生活＃毋忘初衷