求驗客手記:馬列斯新一季繼續fit雲格流晒口水

求驗客手記:
馬列斯新一季繼續fit
雲格流晒口水

過咗個暑假,應屆英格蘭足球先生馬列斯冇退步喎!上周六嘅國冠盃,馬列斯一次精采嘅個人表演,先為作客嘅李斯特城先開紀錄,雖然些路迪之後追平,但李城最後互射12碼贏波。前兩日法國傳媒話馬列斯有機會過檔阿仙奴,相信兵工廠主帥雲格喺今場之後都要加多兩錢肉緊同誠意啦!

馬列斯(上)對些路迪以個人之力幫李城打開紀錄,狀態同上季一樣咁「弗」。

阿奴開價4.25億

上周六突然有法國傳媒收到風,話阿仙奴出價4,180萬鎊(約4.25億港元)收購呢位李城嘅25歲中場,各大英國傳媒都有轉載,有人仲見到馬列斯嘅經理人上周五去咗睇阿仙奴對朗斯場波。雲格亦都講過好多次願意斥巨資買球星,所以呢單嘢都似層層,仲有報道話雲格想買埋里昂前鋒拿卡錫迪。
阿仙奴近年都差個有質素嘅右翼,禾確特剩係識衝落底線、阿歷士張伯倫又唔成才、伊禾比仲未成熟,而艾朗藍斯打中路好啲,如今見到馬列斯呢種識推大位起腳嘅,簡直係阿仙奴前線嘅最後拼圖,雲格仲唔流晒口水咩!

李城上周六互射12碼贏咗些路迪之後,韋斯摩根(中)都有個盃仔捧吓。

入靚波助李城殺「迪」

不過,呢啲轉會傳聞冇困擾到馬列斯,上周六李城作客些路迪場國冠盃入面,佢表現仲係好好。喺46分鐘,佢由右路帶入禁區,面對兩個守衞,佢吸番個大位,起左腳為李城射成1:0。雖然些路迪之後追平1:1,但李城喺互射12碼連入六輪,以6:5擊敗對手。
雖然雲格好鍾意馬列斯,但佢經理人話暫時未收到兵工廠報價,睇嚟係想迫雲格快啲出手。我求大俠都覺得阿仙奴要快手啲,話晒有占美華迪前車之鑑,如果再拖耐啲,李城領隊雲尼亞里同華迪𠱁掂馬列斯留隊嘅話,雲格又會再走雞嘞!
雲尼亞里賽後話:「你哋見唔見到馬列斯好開心?佢喺李城好努力,踢得好,啱啱先入咗波。佢係我哋其中一個最重要嘅球星,而喺其他球隊有好多球星,佢未必踢得番家陣嘅水平,因為佢可能要做後備,所以留番喺度同我一齊最好。」

華迪(右)仲未歸隊,最近同有喜嘅老婆碧琪(左)去葡萄牙度假。 互聯網

而早前拒絕阿仙奴邀請、留效李城嘅華迪最近收到喜訊,佢嘅新婚太太碧琪有咗BB,呢個係佢哋嘅第二個小朋友。