識玩應該咁樣玩，等本土民主前線梁天琦教吓大家！特區政府欲以一張確認書，封殺撐港獨嘅本土派入立法會，喺新東出戰嘅本民前梁天琦首當其衝受影響，被選舉主任羅列佢喺報章甚至facebook嘅撐港獨言論作「罪證」，要求回覆澄清主張；既然fb係搜證途徑，梁天琦一於玩大佢，另設fb專頁留言「會擁護《基本法》及保證效忠香港特別行政區」，如果咁都唔畀佢選，仲有冇奶油先？
梁天琦日前刪除舊fb專頁，另起爐灶設新fb專頁，以《基本法》黑白照做封面，並留言：「我，梁天琦，示明我會擁護《基本法》及保證效忠香港特別行政區。」同時附上被市民諷刺為「洗腦歌」嘅政府宣傳歌曲《熱愛基本法》YouTube連結，證明佢對《基本法》幾咁上心。
網民：入咗場慢慢玩
梁天琦喺個人fb中明言，新專頁係「頭盔版」，擺明係同特區政府鬥法慢慢玩。呢個創意無限嘅反擊法，吸引大批網民留言讚好，新專頁短短一夜吸like逾1.1萬，可見威力無限。有網民支持佢「曲線」撐《基本法》，留言鼓勵：「同689鬥玩語言偽術！」亦有人寄語他要「能屈能伸，入咗場慢慢同佢玩」。而梁天琦嘅個人網站同樣暫停營運，只寫住「網頁維修中」，但網站背景仍然是一幅寫有「本土價值、勇武捍衞」嘅圖片。唔知新東選舉主任何麗嫦，點睇梁天琦呢個咁熱愛《基本法》嘅專頁呢？
李八方
mailto:[email protected]