呢排變身作家，大賣PS相出版《情書》嘅正義聯盟創黨主席李偲嫣，噚日又公開獻……身嘞，喺大埔頭水圍村舉行誓師大會，皆因打正旗號撐警反港獨嘅佢決定參選新界東立法會選舉，咁梗係要喺之前造勢啦。但噚日下午大埔氣溫高達34°C，唔知係咪近日因為同粉絲簽名兼影相，忙到冇飯食唔夠力？佢上台發言時，懷疑中暑暈一暈，要由其他人扶住。
發生乜嘢事？都係本《情書》囉！偲嫣BB話為咗「慳錢」，捱咗十幾晚為新書做校對，搞到精神不振喎。咁本書賣成點呀？佢聲稱賣咗幾千本，有千幾本係公司內部認購，仲打算發行去大陸、台灣同星馬地區，希望新書有6位數字嘅收益，用嚟做選舉經費喎。
手機殼印自己樣
咁新書啲相係咪PS過度？偲嫣BB話角度問題箒，只要細心睇吓，就見到毛孔同乾紋，但都補充任何出書者都會P圖喎。八方發現，偲嫣BB用嘅手機，外殼印咗佢個靚樣，似乎對自己嘅相貌都好有自信。其實佢表明支持特首梁振英連任，不妨轉CY個樣做手機殼，幫對方宣傳吓！
