你以為拍戲先出現嘅場面,喺現實出現咗!《少林足球》大師兄鐵頭功叼住支煙入場被罰黃牌,香港嘅業餘聯賽都有位咁樣嘅高手。上周六一場「發夢皇足球聯賽」嘅銀牌四強賽,Romeo同恒星FC法定時間踢成2:2平手,要互射九碼,恒星嘅張銘達主射時,竟然揸住支煙(圓圈示),為球隊射入奠勝後,仲即刻吸番啖慶祝。賽會秋後算賬,喺fb公佈追加黃牌,點知就俾網民瘋傳。我求大俠搵過「發夢皇」負責人,佢話唔想回應。