代表民主黨出戰立法會超級區議會嘅鄺俊宇，命運同佢至愛嘅逗號相連，最近喺港島出戰嘅魔童王維基，則同劉江華……吖，唔係，係垃圾桶結緣至真，皆因頻頻出動落區宣傳嘅維基，發現有人將自己派嘅單張借花敬佛送咗畀「劉江華」（圖），專程影相留個歷史見證，仲放喺facebook同大家分享，仲自嘲倒自己米！
據聞呢個收到厚禮嘅「劉江華」喺新翠商場出沒，正如維基自己話齋，佢又唔係方丈，唔會小器嘅，話大家唔投佢票唔緊要，至緊要係投畀反對梁振英連任嘅議員。但不忘補充，「當然歡迎你投我一票」。
維基上周連報名都冇通知傳媒，咁秘密唔係有乜景轟，佢話相信唔少人知道佢出選，報名毋須高調，反而密密落區，收集多啲街坊意見。