今年下半年好可能係event-driven？交易手搵食好機會。美國總統大選候選人入閘，民主共和兩黨分別篤定由希拉莉同特朗普競選。無論是狂人當選，抑或美國首位女總統誕生，兩個結局都逆轉政經局面。
有分析員對特朗普選戰作出最牛嘅預測，假如特朗普登上美國總統寶座，現貨金可望升破每盎斯1,800美元關口，較現價每盎斯1,322水平，潛在升幅超過四成，接近500美元升幅。 如果特朗普保護貿易主義政策再下一城，削弱美國經濟基本面，金價重回2011年每盎斯1,910美元並非冇可能。
現貨金價今年累升近兩成半，過去兩個禮拜金價似乎唞唞，回落4%。所謂真金不怕洪爐火，金價係咪牛氣未改，本周有得見真章。首先， 美、日兩大央行議息，息口動向有乜風吹草動，金價首當其衝。金價自英國脫歐後，吸引資金流入避險，刺激金價走上。賭金價上升嘅黃金淨好倉合約，連續兩星期縮減，至29.4萬份，但仍係紀錄以來第四最多。值得留意，押注金價跌嘅淨短倉合約，上星期亦減少咗3,000幾份，至2.93萬份。
再睇番美滙指數回升到4個月高位，都係利淡金價。另外，紐約黃金期貨到期日，撞正同儲局議息日子（27日），仲有美國商品期貨交易委員會7月初通知客戶，提高金、銀期貨合約嘅保證金。記得英國脫歐，外滙交易商都提高英鎊直盤同交叉盤買賣嘅孖展水平，睇嚟金價短線有機會勁chok。
Captain Cool
https://www.facebook.com/seeforcaptain/
本欄逢周一刊出