【澳門直擊】許志安前晚在澳門舉行演唱會,獲太陽娛樂老闆周焯華帶同兒子周柏豪捧場,車婉婉擔任嘉賓。以多個全新造型亮相的安仔,其中幾個look還與老婆鄭秀文(Sammi)上月倫敦站巡唱的歌衫相近,包括安仔的透視黑底裝、紅色網衫以及完騷的灰色套裝,Sammi之前都着過類近款式,可謂夫妻同心。另有一些歌衫則厚如棉被,安仔笑謂:「試衫有皮褸,又有件好似棉被咁厚嘅,但𠵱家只係7月,工作人員話fashion就係咁,夏天着冬天衫,冬天就着背心。」
耳機頻頻壞
下月12日49歲生日的安仔,獲婉婉送上生日蛋糕,安仔即大笑說:「做咗四十幾年人,都未試過要預早成三個禮拜慶祝。」並即時許願:「我願望好簡單,係想部耳機唔好壞。」
原來安仔甫出場耳機已失靈,就算換了新耳機依然出問題,他於完騷後說:「試過開騷個咪冇聲,但耳機失靈會影響到唱歌,最後換到第三部先冇事。以前喺酒廊唱歌,試過有人放蛇,可能係黑社會搞事,所以耳機冇聲好小事。」提到唱最後一曲時激動落淚,他說:「我係真心感動,知道自己前半部唱唔出水準,但觀眾都冇投訴。」
為黎明打氣
無獨有偶,86年新秀戰友黎明前晚亦在澳門開騷,安仔說:「大家都加油啦,睇吓有冇時間去睇,希望可以有機會食到餐飯,食到葡國嘢就好喇!」此外,安仔早前和老婆Sammi、梁漢文及雷頌德等出席派對,梁漢文被指醉酒失儀,要安仔照顧,他說:「大家都係飲咗少少酒,但佢冇醉,我冇成日照顧人,我都要人照顧。」
採訪:曹家誠