記者C來自內地，呢日在中環見到佢揸住成盒KFC（肯德基）食品，狀甚輕鬆，左丁山故意同佢開玩笑，攔途截擊：「你死，捉到你唔愛國，食美帝產品。」年輕人唔怕開玩笑，回敬一句：「唔愛國好耐咯，肯德基、麥當勞、必勝客係我嘅日常食糧，我份人工都幾難支持我去小南國、小肥羊。」咁又係，記者人工低於香港大學生平均薪水，佢單身自內地來港，都係要慳得就慳嘅。記者C在廣東出世長大，去到湖北讀完大學就來港入讀新聞碩士班，於是畢業後可以留港搵工，攞香港身份證，現以香港為家，久唔久先至回鄉一行。內地大學生來港唸過MA學位，一年結業就可以成為香港居民，確係移民捷徑，幾間大學的自負盈虧課程成為賺錢機器，內地學生人數特多，是一個主要原因。
記者C在港如魚得水，皆因本身係廣東人，講廣東話與香港仔無大分別，講普通話又係內地人口音，中文又好，係做本地記者嘅好材料，只嫌呢行人工遠遠不及公務員而已。講番KFC與愛國扯上關係，皆因內地有憤青、憤眾去包圍肯德基店，高呼抵制美日韓菲，保衛中國南海領土。點知素來鍾意煽風點火嘅民粹愛國媒體、環球時報嘅總編輯胡進喺七月二十日就自己走入肯德基食雞，仲喺社交網站上載圖片留言：「肯德基與愛國與否無關。」真係神係佢，鬼又係佢，做老總可以做到咁肉麻，可知共產黨員是異人，不是普通人。胡進咁有獨立思考？睇真啲，原來「人民日報」、「中國日報」、新華社等在七月二十日之前紛紛刊出文章勸喻民眾冷靜，人民日報更講到：「尊重法律，尊重他人的合法權利，愛國的激情才不會成為糊塗的愛，演變成盲目的衝動和偏激的行動。」人民日報咁鬼冷靜，可知道內地人民要愛國必須先聽指示，中央未叫你愛國抵制美日韓菲，你就上街有所行動，其實係找死！你估講聲愛國，就有愛國自由咩，儍仔。
記者C來自內地，竟然懂得「愛國也是被動的」嘅真道理，知道放膽食肯德基、麥當勞，反而係良好的、冷靜的國民。記者C話：「肯德基遲早會俾中國財團買起，甚至連佢嘅母公司Yum都買埋，到時肯德基就變成國企，中美發生磨擦嘅話，我地到時更加要去肯德基，買國貨吖嘛！」