「互聯網未普及嘅年代，係容許尋寶的年代。」沒有維基、谷歌；沒有順手沾來的爆炸資訊，要仔細研究，就要踏破鐵鞋、查根究底。「係好麻煩，但比較有趣。」70後李信佳，是Beyond、達明一派當紅年代成長的一代，為音樂尋根，在旺角信和，買下人生首隻60年代的黑膠唱片，自此不能自拔。在鴨寮街尋寶，翻閱陳年二手音樂雜誌，找回原本不屬於自己年代的流金歲月，寫成《港式西洋風》一書，為短暫卻又影響深遠的半世紀前香港樂隊潮流，補上重要一筆。
記者 呂麗嬋
家住荃灣的李信佳，小小的四口之家，有幅「音樂牆」，像唱片舖，頂上天花版，放了數百隻CD和他心愛的黑膠唱片。有趣的是，音樂牆猶如時光隧道，Joe Junior不再是與胡楓和謝賢，齊齊「扮小生」去旅行的公仔箱甘草，而是輕倚跑車留了厚厚留海的混血美男子。那些年，許冠傑不叫Sam Hui而是Samuel Hui；「矮仔」Teddy Robin泰迪羅賓是潮流指標。街頭巷尾，既有全菲律賓人的本土樂隊，也有全華班樂隊，紅到有本事出樂隊月刊！
「60年代，對香港樂隊歷史嚟講，係被遺忘但又神奇嘅年代」。由李信佳說60年代，似乎有點怪。畢竟男人四十的他，其實並不屬於那個年代。「我係80年代成長嘅一代，遇正香港興起樂隊熱潮，係我哋呢代人嘅集體回憶」。Beyond、太極，達明一派，那些年，他讀和尚寺中學九龍華仁，卡拉ok開始盛行，男生都愛周慧敏和陳慧嫻，他卻愛研究歌詞，追求為時代發聲的band sound。
「好多人都話，80年代，係香港流行樂壇最輝煌嘅時代，但只要細心睇當時嘅香港樂壇，台前幕後都好，唔少都係60年代夾band出身，由羅文到馮添枝，甚至前寶麗金環球唱片總裁鄭東漢（鄭中基父親），都係band友。」他擁有的首張60年代香港樂隊唱片，是Teddy Robin & The Playboys的《Breakthrough》，名符其實的「突破」。「驚為天人，無諗過半世紀前嘅香港本土，已有人玩呢類貼近西方流行搖擺嘅音樂」。
追尋60年代的樂隊潮流，李信佳形容，猶如為陪伴他成長的band sound尋根。「60年代聽得英文歌嘅，大都係讀名校嘅番書仔，我阿媽車衣，愛陳寶珠，阿爸行船，但英文唔算好。呢個年代嘅樂隊好神秘，資料貧乏，更勾起我嘅好奇心。」大他一截的二手黑膠唱片店老闆，成了他的明燈，混熟了，都認得他這個專搵60年代香港樂隊唱片的「後生仔」。90年代移民潮，不少人變賣舊物珍藏離開香港，正好為他提供了珍貴的原材料。「差唔多一半嘅珍藏，都係嗰段時期買落」。
「好多黑膠唱片同舊雜誌，一疊疊咁掉出嚟，好多係絕版，真正千金難求。」今日連唱碟都再無人願掏腰包買，當年的當紅土炮樂隊，卻有本事出版樂隊專屬雜誌，介紹自己的音樂理念。「67至68年間，Teddy Robin & The Playboys總共出咗5期雜誌，全部都係移民潮期間，喺二手攤檔搜集回來」。60年代本地樂隊百花齊放，但也是香港政治動蕩的年代。67暴動之後，港英政府重訂福利政策，以年輕人為對象的新潮舞會，更是一代人的記憶。
「因為出呢本書，訪問咗Teddy Robin，佢提到暴動之後嘅新潮舞會，嗰時被左派大肆批評，視作飛仔聚會，佢話當年香港社會政治氣氛無今日咁濃，第一次因為玩音樂，感受到政治壓力」。不滿、安撫，累積怨氣成計時炸彈，歷史總在輪迴，愈研究愈有興趣，2000年網誌熱，他開宗名義寫60年代band sound，題材冷門卻引來忘年知音。「有啲係50後，60年代正係佢哋黃金歲月；有啲就係細過我嘅80、90後，追回美好年代」。每篇網誌都要資料搜集和整理，很花時間，但他謂滿足感卻很大。
「近幾年，大家都在講集體回憶、文化保育，我覺得呢段香港樂壇歷史，卻好少人提及，彷彿被遺忘了。」由在網絡平台分享到出版專書，本身做保險精算的他，花了足足3年時間，他笑說是一盤計極都蝕本的數。「出版社要出呢類書其實好冒險，但喺我心目中就好有意義， Band Sound係代表年青人嘅音樂，藉着音樂表達自己，感染其他人。」60年代之後是80年代，屬於香港的時代之歌，會否重生？