退隱L三十零歲就做大報總編輯，隔得幾年就俾一位人稱為天才嘅老闆禮聘入咗另一大報，誰不知人的際遇往往不可預測，天才好快就被迫賣咗張報紙，於是老總L也就變成退隱L，不理世事已久。
退隱L現時得閒就編吓書，興起就寫稿投稿，甚為得閒，月前有人搵左丁山出版一本掌相專著，左丁山一睇，知道自己唔掂，於是周圍搵退隱L，約佢吃午飯，請佢睇吓作品手稿是否可以出版。退隱L於是「出關」，搭地鐵到中環，一出地鐵就見到王維基進行競選活動，在皇后大道中嗌咪派傳單。競選立法會議員在7月29日才截止報名，王維基做事有效率，一於搶吃頭啖湯，爭取中環人投佢一票，之不過好多中環返工人士並非住在港島區，恐怕不是他的選民啫。
大家去到南華大廈占美廚房，一望，食客稀疏啲喎，記得以前呢間老牌（85年）中式西餐廳每日中午必定爆滿，點解今日如此環境呀？市道轉變之快速，實在估唔到，唔怪得翠華茶餐廳（編號1314）傳出賣盤消息，似有「啤殼」意圖，如果將來呢類消息得到證實，港交所及證監會又被痛摑一巴掌，利用上市嚟啤殼賺億億聲實非生意正道，亦係拿IPO市場開玩笑。
上菜之後，退隱L講起王維基係中大同期同學，大家不同學系，不同書院，但王維基係學生會活躍激進份子，好多同學都識得佢。激進喎，昔年學生點同今天學生比較呀，想當年，想用電話召集同學示威，不知幾艱難，花時間到極，那像今天用fb一下子就可以聯絡到無數咁多人吖。土耳其軍人搞政變，只懂傳統式搶奪電視台電台，不懂快速封鎖控制電訊網絡，於是埃爾多安總統憑facetime號召支持者上街，咁就反敗為勝。老一派人物如今天不懂利用社交網絡競選，吃虧就在眼前，好在王維基靠搞電訊發達，呢方面唔會輸蝕俾任何人，適逢今次立法會選舉泛民分裂，建制派要換血捧新人，不少候選名單排頭位嘅知名度低得可憐，都唔知係乜貨色，點選呀，於是政壇新仔王維基反而因為知名度高，佔到優勢，當選機會係有嘅，至於能否最後成功，就要睇劇情發展，難以下結論。我地傾傾吓，突有人來電話，講到要參加功能組別競選，想左丁山幫手做參謀，唉吔，幾乎破壞食慾，推都推唔切啦，政治公關呢門生意，留番俾啲有能之士去做咯！