【澳門直擊】黎明（Leon）繼4月尾在中環開騷後，昨晚移師澳門新濠影匯綜藝館舉行一連兩場「黎明Leon Random Love Songs Live in Studio City 2016」，Leon粉絲團黎明家族昨晚花3萬元包下一個12人包廂力撐偶像，演唱會昨晚上約8時32分開騷。
Leon先台上現身跟觀眾打招呼：「Hello，say個hi先，上邊嘅人唔好挨咁近玻璃（VIP廂房的落地玻璃）。呢個出場形式應該係最後一次，因為個階段過咗先有新嘅階段出嚟。祝大家暑假愉快開心，跟我去嗰邊再say個hi先。」說罷由台的右邊行去左邊，豈料他步行期間台上熄燈，Leon即拋金句說：「幾現實㗎喎熄晒燈，我都未去到嗰邊。」跟粉絲打招呼後，Leon便返回後台準備正式演出，在女舞蹈員伴舞下獻唱《DNA出錯》，之後再唱《危情歲月》及《Ellie》等等，演唱會rundown跟香港大致相同。
唔在乎冷氣
演唱會昨晚8時50分在新濠影匯官方facebook直播，Leon說：「今次首次航拍，不過大家放心，唔會喺你頭上面飛過，若果失控，都會喺空中懸掛10分鐘先跌落嚟，大家企定唔好郁就得㗎啦。」直播完後他與觀眾歡呼，並謂：「今日我哋有冷氣啦，其實上次我唔在乎有冇冷氣，有時你在意又會冇咗，當你唔在意時又會有番。」
而演唱會開始前，約下午5時半，穿上大會T恤及戴住黑超的Leon，先現身跟被抽中的三女一男粉絲，在8字摩天輪前大合照，之後再齊齊坐上摩天輪。現場所見，Leon在摩天輪中跟4位粉絲全程有講有笑，粉絲並一早預備CD等物品讓Leon簽名。玩摩天輪期間，Leon應要求再跟粉絲合照，甚至搭着粉絲的膊頭影相，認真識做。坐了大概12分鐘摩天輪後，Leon便急急離開，趕往為演唱會做準備，但他仍應在場記者要求停下來拍照，臨走前還揮手講拜拜，心情甚靚。
講克服畏高
昨日4位與Leon玩摩天輪的幸運粉絲包括來自澳門的Lucia、香港的Ivy、中山男阿菊及來自順德的婷婷。Lucia透露在摩天輪上Leon分享自己拍廣告玩笨豬跳及玩跳樓機時，如何克服畏高。問到Leon玩摩天輪時可有爆金句？順德婷婷笑說：「唔使乜嘢金句銀句啦，大家都係傾吓啲平常嘅嘢。」據悉今晚Leon將改與粉絲玩「蝙蝠俠夜神飛馳」。
採訪：馬建華
攝影：陳俊強