32歲「小背心」李彩華（Rain）轉戰大陸拍劇幾年，吸金力強，又係出咗名嘅圈中小富婆，身邊一直不乏裙下之臣，據知Rain同過氣「新五虎」何遠恒秘撻近3年，當年何遠恒喺無綫捧極都唔紅，結果敗走大陸轉行做生意。
昨日有周刊爆李彩華想兩年內結婚，早前同男友何遠恒一齊去歐洲睇球賽，感情穩定，據報道講何遠恒離開大台後， 佢就喺大陸投資冷氣、裝修及瓷磚生意，收入都唔少，李彩華就向報道透露佢同男友有共識，暫時專心事業，佢都想有自己空間，未想太快結婚，總之二人都視對方係結婚對象，李彩華亦大讚何遠恒嘅表現好過之前嘅男友嘅，結唔結得成婚，仲要觀察男友表現，不過佢諗如果結得成婚應該係呢兩年嘅事。
此外，李彩華一向投資有道，手頭已經有5個豪宅喺手，佢在報道中坦言暫時唔會喺香港買樓，因為要畀雙重印花稅，認為唔值得投資，今次佢同男友嘅歐洲之旅，佢哋喺英國都有去睇樓盤，佢亦想喺澳洲及加拿大置業。投資咁叻，睇嚟兩年內做少奶奶真係一啲都唔難!