有「詞壇聖手」之稱的盧國沾（沾Sir）前晚在紅館舉行作品展，除愛徒羅嘉良，還有葉振棠、柳影虹、李龍基、麥潔文、曾路得、歐瑞強、雷安娜、薰妮、陳秀雯及張德蘭等擔任嘉賓，演繹沾Sir筆下的名作，而沾Sir就在太太和女兒的陪伴下安坐VIP區睇騷，其間薰妮、歐瑞強及張德蘭分別落台與沾Sir握手。葉振棠打頭陣，柳影虹緊接出場，一出台就向沾Sir鞠躬，並笑謂：「等咗呢個演唱會30年，等到頭髮都白晒。」
薰妮落台欲跟粉絲作互動時，她面前的升降台正降落，準備接舞蹈員上台，台邊的觀眾即時叫停薰妮，她說：「嘩！真係好彩，唔係跌落去就大件事，今年係我人生第一個甲子，真係多謝恩師盧國沾先生。當年我患紅斑狼瘡時，都冇喊過，反而知道沾Sir要坐輪椅，我就真係喊到出唔到聲。」
患紅斑狼瘡想辭演
薰妮演唱過後，大爆曾經想推辭今次的演出，她哽咽說：「好多朋友都知我呢8年經歷好多，因為有紅斑狼瘡，好難控制自己，怕發生問題時會失準令大家失望，病發嗰時會眼腫面腫，但𠵱家聽到咁多掌聲真係好開心。不過我講過，只要係盧國沾，我打橫打直都會嚟。」
此外，李龍基唱完《怒劍鳴》後說：「沾Sir嘅歌可以改變人一世，有人試過好失意想過自殺，不過聽咗《浣花洗劍錄》之後，覺得好有啟發性，就打消呢個念頭。」他笑問觀眾：「有冇人想自殺？我唱呢首歌畀你哋聽。」雷安娜唱出《變色龍》，她又讚沾Sir好有魅力：「我媽咪86歲都要喺溫哥華返嚟睇騷。」
採訪：王連連
攝影：沈健程
