星期日晚到沙田馬會凱旋廳食飯，估唔到坐在前後左右都係相識朋友，如證券H、律師L、建築T等等，到洗手間洗手，又碰到船務T，佢問：「去咗曼谷旅行呀？文華東方真係一流酒店嚟㗎，我三十年來到全世界出差無數次，加埋私人放假旅行，住過好多好多五星酒店，始終覺得曼谷文華東方最令我感覺到賓至如歸呢四個字係乜意思。不過弊在呢，潮流興減價搶客，曼谷文華東方就極少減價嘅，相形之下，對面河嘅曼谷半島酒店就不時大減價、小減價，好抵住。」
咁就勾起左丁山昔年公事。曼谷半島在1980年代初就位於今天的Anantara（以前麗晶、四季），後來因市道不景，生意差，泰國投資夥伴要將股權公開招標出售，結果嘉道理集團可能一時大意失荊州，俾薩加先生（Adrian Zecha）策劃嘅投資公司以較高價錢奪得控制權，變成曼谷麗晶。之後半島尋尋覓覓，卒之在文華東方對面之湄南河畔再起一間曼谷半島酒店，點知落成之時，就遇上亞洲金融風暴，真唔好運，故此投資講時勢，大勢唔就，主理人幾叻都冇用。
好彩半島酒店有歷史根基，實力雄厚，曼谷半島始終屹立不倒，住得過之至。左丁山住過兩次，記得第一次入住時，間房居然有傳真機，夜晚寫完稿就在房內傳真回港，非常方便，最啱左丁山呢類寫稿佬。至於減價與否，與酒店經營策略有關，亦與檔次有關。記得薩加先生當年在曼谷麗晶同左丁山講過：「米高嘉道理先生好好心機興建呢間酒店，大堂設計與天花壁畫，直情以香港半島為藍本。有咁靚嘅酒店，長期有賺冇蝕嘅，俾啲耐性就得。我經營酒店，一定要五星豪華級，位於靚區靚位置。在大風大雨旅遊慘淡之時，呢類酒店有得守，點都有住客。譬如香港麗晶，若減房租五成，就一定搶到假日酒店啲客啦。」呢兩年香港就有如此情況，自由行過夜客大減，啲工業大廈改造嘅三星酒店就立即拍烏蠅，令唔少工廈改酒店工程急急叫停啦。
講起住靚酒店，珠寶L話現時澳門酒店入住率低，星期日至星期四既房租減得好緊要，如果有時間過澳門，最好入住Ritz Carlton喎，佢話不時同家人過大海吃佛笑樓乳鴿，星期五一早鬆人，費事同人逼，十幾間五星酒店都住過，現時就集中住在RC。其實澳門啲酒店好鬼死貴，如果過去賭錢輸埋，加埋更貴到肉痛，周末不如去曼谷住靚酒店食翅仲抵。