假假地踢過阿仙奴同曼聯等大會、又贏過英超神射手、現效力費倫巴治嘅荷蘭射手尹佩斯，希望離開局勢動盪嘅土耳其，之前傳出佢想返英超，但韋斯咸、史篤城都唔吼佢。32歲嘅尹佩斯𠵱 家希望加盟巴塞隆拿，巴塞本身已經有「MSN」組合，真係多佢一個唔多，所以佢都好識做，放晒風聲話踢後備都冇所謂。不過巴塞今夏買人方針都係年輕化，之前收購一對法國後衞烏姆迪迪同盧卡斯迪治尼，都係93年出世，而新簽入嘅22歲葡萄牙中場安祖高美斯，就視為恩尼斯達接班人。巴塞今次買高美斯都好重本，除咗支付3,500萬歐元（約3億港元）轉會費畀華倫西亞，仲送埋青訓產品嘅翼鋒基斯甸泰路同後衞馬田蒙度亞畀華倫做籌碼，成單刁估計成5,000萬歐元（約4.3億港元）。