等到頸都長埋嘅西九文化區計劃，終於有第一個永久展館落成，就係喺未來西九公園入面嘅「M+展亭」（圖），9月會正式開幕，頭炮展覽就係本地藝術家曾建華嘅「曾建華：無」，係佢喺威尼斯視藝雙年展嘅延續展，到時將免費開放。
西九管理局行政總裁栢志高話展亭成本達3,000萬，冇超支亦冇延誤，對嚴重超支嘅西九文化區嚟講真係好難得。
M+展亭有兩層，有310平方米展覽空間，外形呈不規則形狀，中庭有片小草地，種咗一棵代表香港嘅洋紫荊樹，外牆就以鏡面包圍。
栢志高話日後西九公園種滿樹木，樹木影像倒影喺鏡面令展亭有如隱藏喺公園，亦有觀景台可飽覽無敵大海景。佢話展亭係未來M+博物館嘅試驗場地，稍後會舉辦有關設計同香港70至90年代流行文化嘅展覽，希望試吓香港人口味。