白鴿黨議員涂謹申（圖）任內經常處理唔少奇案，估唔到佢前日返到屋企樓下，去櫃員機攞錢期間又有奇遇。話說一名的士司機突然塞咗條車匙畀阿涂，話自己被幾個飲醉酒嘅乘客打咗一身，佢要落車追賊，由於怕的士塞住條路，所以希望阿涂幫手開走架的士。
阿涂初時唔知點反應，到搵到架的士先記得自己唔識揸的士！呢個時候有差人嚟到，佢一開口就問阿涂：「涂議員，你幾時走咗去揸的士？」阿涂忍得好辛苦先冇笑出嚟，解釋部的士唔係佢，最後都係要阿涂同差人一齊搵番個的士司機，件案亦交番畀差人處理。
阿涂返到屋企同太太仔仔講番件事，佢哋都笑到碌地，阿涂亦不禁嘆句：「原來有事要搵涂謹申，開走的士也是。」