立法會大選仲有不足兩個月就舉行，九龍西選區已出現本土派、港獨派大混戰。本土力量主席何志光（圖右）同民主進步黨總代表楊繼昌（圖左），昨宣佈合組名單出戰九西，全力狙擊計劃喺九西角逐連任嘅普羅政治學苑主席黃毓民。
兩人話黃毓民係「本土騙徒」，楊繼昌鬧教主近年言行不一，對本土運動做成傷害，將會全力踢走佢及其合組參選嘅政治聯盟，即熱普城名單嘅陳雲、鄭錦滿、鄭松泰及黃洋達等，由於今屆九西有唔少本土派候選人爭同一票源，所以先要藉選舉向選民解釋教主嘅問題，繼而踢走對方，期望九西6席中有4席非建制派當選，而呢4席冇黃毓民，至於佢哋名單係咪當選只係次要。
何楊二人話唔會簽確認書，楊仲話更加唔會簽署報名表入面擁護基本法聲明，話不認同不合時宜嘅《基本法》，希望藉拒簽聲明而被取消候選人資格，藉以對《立法會條例》相關條文進行司法覆核，不過佢兩個咁樣隨時冇得選，仲點狙擊話明會簽確認書嘅教主呢？