做咗好友足足兩個月，本欄正式喺星期四定為食糊大日子，其實並非一面倒由睇好轉為睇淡，重點其實係由進攻期變為觀察期。
一嚟恒指去到舊年9月至12月形成嘅密集阻力區22000點；二嚟最受惠低息放水概念嘅地產股之一新世界發展（017），星期四出現大成交射擊之星訊號，證明最強勢嘅本地地產股都腳軟；三嚟股市實際對於放水亦有所反映。
最後亦係最重要嘅，係作為熊市反彈計，主要股票指數由低位升兩成，絕對係一個要小心嘅情況，事實上亦睇唔出港股有乜進入牛市嘅條件，寧願離場觀望，暫時將策略限制於小注短線炒作，等有更多證據證明港股出現牛市之時，先再重注買都未遲。
下星期五日本央行議息，之前講過日央行有可能按兵不動，為嘅係吊住投資者鋪憧憬。事實上，日經平均指數喺低位升咗2,000點，同埋Yen由7.7算跌到7.2算，股市唔跌、Yen唔升就似乎唔係出招時候，就等於鋤大弟，唔危急點會輕易出隻葵扇二。而近期日圓因為放水消息而返到去7.2算，喺半年上升軌水平，相信有支持。就算唔去日本玩，揸Yen似乎都係唔錯選擇。
晉佳
http://fb.com/advanceguy1
本欄逢周一、三、五刊出