話就話市道唔好，零售業界成日走出嚟訴苦，不過呢排出街真係好多人，特別係天氣熱，商場更加逼爆。無他嘅，暑假又到，但對球迷嚟講就係噩耗，事關歐國盃完咗得番啲熱身賽同歐聯、歐霸外圍賽等，要到八月中英超、西甲等先相繼開鑼。
西甲當地時間8月19號先開鑼，唔知係咪開「咧」時間遲，定西班牙經濟麻麻，暫時大交易真係唔多，連英超嗰種領隊大執位都唔見，「西超」三強仲係安歷基、施丹同施蒙尼教，最大轉變係「歐霸盃之王」西維爾，教練艾馬利過檔巴黎聖日耳門。
講開愛隊皇家馬德里，點可以唔提偶像施丹，教半季就幫皇馬拎歐聯，係有運但都叫有成績。堂堂銀河艦隊今夏出手唔算多，保羅普巴收購戰已經打退堂鼓，就算回購艾華路莫拉達，有傳都係準備將佢轉售圖利；不過會方未解決賓施馬會唔會坐監，C朗開季要休息幾耐等問題，暫時未放人住。當然，以皇馬基本班底，除咗中堅組合比比同沙治奧拉莫斯有啲老化，大部份都算當打，唔買人仍然係爭標分子。
但講番轉頭，皇馬會長佩雷斯放唔放水畀教練買新球員，往往係信任度寒暑表，好似前朝賓尼迪斯就冇乜水買人，主要收購不過係中場高華錫。皇馬出戰國冠盃前夕，仲傳出施丹同佩雷斯就起用挪威神童馬田奧迪加特嘅問題有爭執，據報施丹覺得奧迪加特未夠班，新一季想借佢走，亦唔打算帶佢去美國；佩雷斯為宣傳也好賣波衫也好，堅持要帶佢去。施丹會唔會屈服喺國冠盃重用馬田仔，間接反映兩人關係好壞；但坦白講，就算𠵱家冇咩事，皇馬教練呢個位都係做唔長㗎啦。
文：牽牛