發達機會又嚟啦，累積頭獎彩金達1億元嘅六合彩暑期金多寶，今晚開彩，馮仁昭馬上搵咗堪輿學家麥玲玲，同為吳若希算過拍拖嘅堪輿學家陳定幫為大家提供貼士。
麥玲玲前日搶先到將軍澳寶琳嘅投注站落注，佢過去兩次預測，試過每注中兩個字，今日下注貼士係：「當旺時辰係中午11點到1點，或下午3點到5點，財位東南邊，港島區朋友可以考慮喺石澳投注，九龍就喺油塘、鯉魚門，新界喺將軍澳、清水灣、沙田。由於火比較旺，着橙色、紅色、粉紅色衫能夠搶旺，當旺投注窗口就係7號同8號。」麥玲玲仲話生肖都有影響，屬猴朋友犯太歲，宜買冷門號碼，屬雞、牛則可以買熱門號碼。屬兔、鼠、豬今年當旺，不妨同佢哋夾份。佢再提今日係大暑，火旺，可以多揀單數數字同9字尾數字。
陳定幫占卦
陳定幫師傅噚日揀去柯士甸道嘅投注站買六合彩，佢用占卦算出六個幸運號碼，分別係4、7、9、26、29、39。幫幫師傅話呢間投注站周圍有好多修路、裝修同地盤：「周圍動土，容易令投注站破財，佢又喺西南財位，女士嚟呢度買特別旺，不妨着紅色。」
撰文：馮仁昭
