皇家馬德里向來係夏天轉會窗焦點，因為佢哋總有無限金錢去增兵，幾次破世界紀錄嘅轉會費都係出自銀河艦隊。不過，今個夏天，皇馬出乎意料咁沉寂，重磅交易淨係回購艾華路莫拉達，變咗架潛水艇咁，唔通會長佩雷斯真係咁忍得？
佩雷斯嘅管治理念好簡單，佢要將皇馬打造成世界第一球隊，個個球星都渴望嚟呢度踢波！今個夏天，難得90後少有拍得住尼馬嘅保羅普巴流入市場，仲送晒秋波，首選皇馬，次選先係曼聯，但皇馬竟然放棄唔跟落去，真係幾奇怪。
第一，錢從來唔係皇馬嘅問題，破紀錄亦濕濕碎；第二，普巴係法國人，係教練施丹嘅同鄉，照計施丹唔會抗拒；第三，尼馬係90後最出色嘅前鋒，當美斯同基斯坦奴朗拿度老去，最可能稱霸嘅就係巴塞隆拿嘅尼馬，而普巴家陣係法國兼祖雲達斯嘅中場核心，如果皇馬加以培養，料普巴將來可以喺名氣同實力上同尼馬抗衡。喺球壇新一代嘅頂尖球星入面，皇馬其實最想要尼馬，但巴塞實唔放，之後就數到普巴、哈利卡尼、夏薩特同基沙文。夏薩特上季踢到屎一樣，卡尼就喺歐國盃隱咗形，可能佩雷斯都唔敢博；基沙文就喺另一支死對頭馬德里體育會度，難買程度拍得住尼馬，所以普巴係佢哋買星嘅最好選擇。
抑或係，皇馬知道普巴個心一直喺銀河艦隊度，所以根本唔急住搶，到第日有需要先至召普巴過檔都未遲。又係嘅，皇馬要買曼聯人，有邊次唔得手㗎？呢次皇馬表面上鬆章畀曼聯，可能佩雷斯只係當畀普巴去間勁啲嘅衞星球會練級，等到普巴稱霸英超後，先以「兒時夢想就係踢皇馬」嘅方式加盟。
文：咖喱