臨危上陣循新東出選嘅民主思路麥嘉晉（圖），原來擇日喺25號報名，呢排除咗不斷落區宣傳，亦積極操fit自己，為稍後嘅選舉論壇備戰，事關要喺三言兩語之間講清楚理念，唔係咁容易。
雖然政壇上係新丁，但麥嘉晉13年前做港大學生會會長時，已經有戰績，有份踢爆時任教統局長李國章開會打機。佢同八方講，嗰陣已經諗過從政，但自覺對社會認識唔多，於是先投身社會工作，到今年初見到旺角騷亂，唔忍心睇到社會分裂成咁而踏上從政路。
佢主張先搞番好民生問題，同時同北京建立恒常溝通機制，等社會氣氛好轉就有利民主政制發展。至於簽唔簽確認書？自言係民主派嘅佢解釋，份確認書係有法理基礎，所以會簽，仲話唔簽都係政治騷。