話說越野兔幾年前已經開始用Spotify聽歌，但免費廣告越來越煩，最後終於試吓個Premium版啦，好處真多，可以download定離線聽慳data，又可以想聽咩就聽咩，仲唔洗聽佢啲煩膠廣告。如是者，越野兔每個月心甘情願由得佢喺信用卡過數48蚊喇！
用咗一排Premium，發現原來有個仲抵嘅家庭plan，聯同其他家庭成員一齊用，第二位開始半價。換言之，六個人用一個月都係168蚊，除開每人28蚊。最近Spotify又改咗遊戲玩法，78蚊一個月，可以六個人共享，每人每月13蚊就得喇，變相劈價54%！
點解大平賣？Spotify每月活躍用戶上個月剛突破1億，畀錢嘅訂閱戶數為3,000萬，完勝蘋果嘅Apple Music一倍。但人多又唔等於賺到錢，由於公司收入七成以上支付唱片公司及藝人，餘下資金作發展用途，令公司2015年仍蝕逾2億美元，真係有李嘉誠加持都搞唔掂。
睇番對手Apple Music，雖然時間上輸在起跑線，但憑手上持有大量iPhone用戶的優勢，家庭plan亦都係78蚊一個月，就可以六個人共享，用戶數目增長快過火箭。所以Spotify最近變陣割價，其實就係想同Apple Music死過！
環球音樂串流市場競爭激烈，本土市場除Spotify及Apple Music，仲有台灣的KK Box、騰訊（700）的JOOX、電盈（008）的MOOV等；又有Google Music，連Amazon亦搞緊串流音樂，江湖上一場腥風血雨已展開，劈價鬥爭客結果係點？我哋交少啲月費！
越野兔
http://fb.com/Sailorrabbit