馬天佑原來用真名係高登開咗戶口，仲開post話有野爆，有唔少網民真係留言問佢嘢，留咗10幾頁，當然有要佢爆料，又笑佢之前同千語BB個單嘢、又有人留言唔知佢係邊個....又話佢開post爆料，最後無嘢爆....
「蘋果」問番馬天佑點解會用真名玩高登，佢就話：「我之前接受咗高登雜誌訪問，一個月後佢哋畀咗個認證我，我咪諗住傾吓偈，開咗呢個topic，真係有人問吓公司請唔請人、有冇娛樂秘聞爆，啲人以為唔係我，我咪叫佢哋睇我Facebook live，即時覆佢哋，等佢哋知真係我本人開account，我知呢個post連續3日都係佢哋第一頁，不過都有話我冇嘢爆，其實我可能開錯topic。」
問佢玩玩吓又唔玩似「潛咗水」，會唔會因為被巴打敢言嚇窒佢，佢話：「我呢個post可能開錯topic，令到網民覺得我冇嘢爆，都有10幾頁留言，都學到嘢，下次諗到啱topic會繼續開post，亦都會同其他巴打留言吹水。」
馬天佑自言係「關家姐」介紹佢睇高登：「我喺英國返嚟，個次15、6歲，關心妍介紹我睇關家姐呢篇文，覺得高登巴打創意無限，覺得佢哋好抵死，仲有講感情關係，小說我都有睇，佢哋好堅，會留意咖哩啡撞衫、綠葉一日死幾多次，古裝人戴手錶。」
節錄網民留言：
網民；「可唔可以免費幫我做形象指導」
馬天佑：post張相黎睇下先啦！冇圖冇真相！
網民；「陳法拉好唔好人?」
馬天佑：超級無敵好人加專業，你有冇睇過我幫佢影過七宗罪d相先，佢都好like ga
網民；「點識超蓮?」
馬天佑：係容祖兒既英國演唱會識既
網民；「睇咗好耐你張相都唔知係邊個」
馬天佑：你拎張馬既相出黎 就記得架啦 我塊面咁長
網民；「你係咪處」
馬天佑：唔係
網民；「請唔請人？ 」
馬天佑：請打雜