立法會主席曾鈺成噚日為佢嘅新書《英語‧人生》喺書展開壇，同英文專家詹德隆對談，其間談及佢哋母校聖保羅書院一位叫John Eynon嘅英文老師往事，阿曾笑指呢位老師同長毛一樣，「好敢於、善於突破規矩，所以成日令佢身邊同事皺眉頭」。談往事都要講起長毛，阿曾對長毛真係非一般交情。
阿曾形容呢位老師好傳奇，喺香港教書後又去咗新加坡，之後諗住返祖家愛爾蘭退休，點知學生與同事送佢去機場、話唔捨得佢後，佢當眾撕咗張登機證，繼續留喺新加坡教書同做義工，約兩年前先過身，其間阿曾都有去新加坡探佢，但呢位老師已記唔起阿曾咯。
坦承過去「窒人太甚」
八方睇過本新書節錄，載有好多曾鈺成嘅年輕照片，包括當時嘅黑框眼鏡文青look，嗰副厚厚嘅眼鏡，說明佢讀書應該好用功，大家亦可以發現佢應該從來都冇肥過。（細佬曾德成同樣極粗框！）
論壇主持話見阿曾立法會辦公室好多字典，阿曾自爆現時主要睇手機、上網查，仲陰陰嘴笑稱：「我唔係睇何俊仁嗰啲！」佢話黃毓民發言時成日拋書包，自己都要上網查吓有冇錯，更正議員讀錯字詞前，除非自己好肯定，否則都會先查一查字典，「唔敢當自己所有嘢都識晒。」
退下火線，阿曾話當年，竟然有啲良心發現，回想以前窒記者、喺居民大會窒一個篤佢心口嘅師奶，都令佢感到好心涼，結果當年立法會選舉輸咗，令佢知道選舉唔可以咁做！其實𠵱家笑騎騎，同記者和睦相處，咪幾好，點都好過當年咄咄逼人。
李八方
mailto:[email protected]