中環機利文新街14至16號添謀大廈早兩個月全幢易手，竟然影響到股評人胡孟青（青姐）。原來青姐好鍾意幫襯嗰度地下一間時裝店Sequel，大廈業主賣樓，Sequel老闆順便唔做，閂門大吉，搞到青姐𠵱家唔知去邊度置裝。
青姐一提起Sequel就感到可惜，佢話以前一做完電台節目就會走去行個圈，睇下有冇新貨到，嗰間舖頭賣嘅名牌衫係原價三折左右，十分抵買，好多中環OL幫襯，佢以前成日喺嗰度置裝，最多一次買成5,000元。𠵱家佢閂門大吉，青姐唯有轉為網購平靚正衣物。
估唔到喺股評人界當中，除咗黃德几出名貪靚，着衫鍾意襯到絕之外，青姐亦咁愛好時裝，睇嚟兩人除咗講股票，仲可以交換買衫心得㖭喎。又希望青姐快啲搵到另一間平靚正嘅時裝店，介紹畀中環好姐妹喇。