預計英格蘭足總會喺日內確定，任命新特蘭61歲主帥「大儍」艾拿迪斯接任英格蘭國家隊領隊。大儍護級就叻，教國家隊掂唔掂㗎？睇嚟「三獅兵團」將會重現高Q大棍、打死罷就風格。
力壓艾迪賀維、布魯士
英格蘭喺上月歐國盃16強爆冷輸畀冰島，主帥鶴臣隨即請辭。傳過英足總想搵奇連士文等大牌教頭，但全部冇下文後惟有搵番土炮。睇番最終人選艾拿迪斯、艾迪賀維同布魯士，都幾戥英軍悲哀，最後揀咗61歲嘅艾拿迪斯，預計英足總高層周四開完會確定細節，好快就會正式公佈。大儍歷年嚟以領隊身份出戰467場英超，只有費格遜、雲格同哈利列納比佢多，但勝率只得33.6%；咁多年嚟淨係贏過一次英丙錦標同幾次英超每月最佳領隊，唯一值得引以自豪就係領隊生涯從未護級失敗過。
球迷亦唔好期望大儍會帶嚟咩悅目踢法。新特蘭上季英超平均控球率得39.94%，傳球佔21%係長傳，相比阿仙奴只佔大約8%，好聽啲咪叫踢法簡單直接。但大儍本人唔鍾意咁比較：「雲格啲球隊嚟個50碼長傳就話係精準傳送，我哋照咁做就被批評係博大霧。」其實艾拿迪斯以往同奧高查、希亞路同安歷卡等大牌球星合作過，好多球星都肯聽佢支笛賣命。新任曼聯主帥摩連奴同前英格蘭主帥艾歷臣，都表態支持大儍，摩佬話：「佢一早準備好晒做呢個位，有能力激勵球員，帶動全隊士氣。」
卡路爾啱踢 邀泰利出山
大儍一登龍門，英軍陣容會有咩轉變？預計佢會揀番啲配合到戰術嘅球員回歸，好似俾人笑係「銀樣蠟槍頭」前鋒安祖卡路爾同中場卡域克等，甚至話會說服泰利復出；新特蘭喺周三熱身賽作客大勝哈特普爾3:0，梅開二度嘅大儍愛將迪科爾亦有機會重返英格蘭。大儍離開新特蘭，後者亦做好準備，一落實就會任命前愛華頓同曼聯主帥莫耶斯接手。