女見習生蔣嘉琦上季一出道，即贏出37場頭馬，捧走首屆「告東尼獎」和應屆「最受歡迎騎師獎」，當街頭巷尾都高談嘉琦BB，馬圈還有另一位見習生默默耕耘。黃皓楠（Jack）上季亦有22場頭馬進賬，二人年紀相若，傳媒同馬迷難免會將他們作比較，這會對皓楠哥都構成壓力嗎?
Jack表示：「我同蔣嘉琦係良性競爭，大家都係見習生，又一齊喺學校受訓，甚至我哋訓練嘅programme都好相近。佢贏馬，我都會替佢開心，對自己都係一種推動力，但亦唔會因為佢嘅成功，而影響到出賽嘅心情，所指係求勝心切而太心急魯莽，反而更需要更集中精神。」
黃皓楠又補充：「始終把口生喺人哋度，控制唔到，再去諗都係冇用，佢哋亦唔會停止比較，但有兩件事我可以控制到，就係陣上嘅能力同發揮，以及賽前嘅準備工夫，要問自己係唔係已經做到足，呢兩件事係可以控制，我寧願集中精神做好呢兩件事，控制唔到嘅嘢，我會放埋一邊，聽完就算，睇報紙，我都多數睇圖片，少理輿論。」