去年10月22日是黃皓楠的22歲正日生日，適逢當晚有賽事，而當晚其師傅徐雨石竟大罵徒弟，向皓楠哥送上另類生日禮物，究竟所謂何事？
這位年輕騎師憶述：「喺舊年10月22日跑谷草1200米（總場次127）夜馬開跑前，當然有諗過會唔會有馬贏慶生，點知『愛寶』出閘推騎咗百幾米，放唔出頭，只守3、4位，已經做唔到師傅原本嘅指示，跟住入直路仲要跌埋鞭，結果連前三名都冇，只得第7。我一落馬解鞍，師傅已經鬧得好緊要，完晒當晚賽事後，我再打電話同師傅道歉，嗰陣自己好Down，因為『愛寶』係上風馬，匹馬狀態好好，亦預計有好形勢，但自己犯咗幾個錯誤，斷送機會。」
到10月23號嘅晨操，以為石哥下咗啖火？原來係未。黃皓楠說：「第二朝佢繼續鬧，之前都未試過咁惡，鬧得咁犀利，令到我好深刻，到下午佢好平心靜氣同我講，呢場馬喺發揮上出咗乜嘢問題，再睇番片段，認真檢討點解會有咁多失誤，要諗辦法去改善。」