【本報訊】英超即將於下月開鑼，電盈（008）昨日宣佈，旗下nowTV與LeSports HK樂視體育香港將以聯合品牌頻道，一齊直播2016至2019年三季所有賽事。有傳是次播英超，樂視向nowTV開出「狠辣條款」，將獨佔英超時段內的廣告收入，又限制nowTV的宣傳手法。
記者：梁偉聰
新聞稿指，8月開始，LeSports HK與nowTV的客戶均可各自透過11條聯合品牌頻道，包括10條雙語頻道及一條英語頻道，收看全部英超賽事。球迷亦可透過各自的OTT平台收看直播賽事，或利用點播服務重溫賽事。
有傳來季nowTV絕大部份英超時段廣告收入將撥歸樂視，nowTV只有微利。據廣告業內人士指，是次合作，nowTV是直接轉播樂視制作的內容，故廣告費是由樂視收取，nowTV不會有英超時段的廣告收入。
轉播成本較低 now未必輸
廣告費用方面，有傳樂視來季英超全季套餐大約盛惠150萬元，相比nowTV在2014至2015年度廣告套餐的280萬元，便宜四成半。業內人士只表示，廣告費是比nowTV平，但他指，「成季買緊係覺得平咗，但睇埋收視又唔知會跌幾多，同埋拆開買佢玩法同nowTV唔同。」
另外，有指樂視為nowTV設下不能說的「敏感字眼」，壓制對手marketing效果。本報就上述問題向樂視查詢，但樂視於截稿前都未有回覆。
不過，nowTV及電盈在是次合作中未必是輸家。分析師表示，雖雙方一直未有公佈nowTV轉播的作價，「但相信一定比以往bid番嚟平，而樂視收晒廣告，某程度代表電盈唔係畀好多錢，所以有咁嘅安排」。他認為，是次轉播電盈「有着數」，「唔使bid又有得播，客戶唔會因冇得播而流失」。而nowTV主要收入來自月費，廣告並非佔很多。
新鴻基金融財富管理策略師溫傑認為，「唔分廣告好正常」，雖然nowTV失去獨家轉播權，但總算有得播，「可能吸唔到新客，冇新收益，但至少唔使流失舊客」。
溫傑指，樂視自進入市場以來，手法一向進取，以特價搶佔市場，「如果市場有低價競爭，其他公司嘅廣告會少咗，就算留番低嘅廣告都有減價壓力」。