退休會計師R行經太子大廈，俾有線電視新聞台攔途截擊，三人包圍，會計師R避無可避，問記者想點，記者就問佢有關銀色債券（Silver Bond），有乜意見呀，買唔買呀，抵唔抵呀？諸如此類問題。會計師R話好唔忿氣街上咁多行人，點解有線記者一眼就睇中佢已經達到65歲，自問個樣仲幾年青箒。我地聞言，笑到碌地，1973年中大畢業，今年65歲，有多冇少啦！
銀色債券在7月26日開始申請，利率與通脹掛鈎，最低保障利率係2厘，不准轉售，要持有三年等政府贖回，無二手市場。咁嘅條款，有辣有唔辣，最佳條件當然係保本有息收，弊在息率唔係太吸引，例如港島居民日日用電，大可買番隻2638港燈商業信託，近排當炒，升到$8以上，可能升得比較急，風險大咗，但只要能夠維持派息四毫嘅話，息率仍然有5.06厘；好似沙田陳太咁，5.3元買入揸到依家，息率高達7.54厘，笑到四萬咁口。唔怪得佢從來唔買ibond，更話唔會考慮Silver Bond。
沙田陳太因為揸住2638，對港燈網上消息特別留意，呢日又心思思上網（睇多幾次先至放心）睇港燈盈利及派息，知道2014年港燈稅前盈利40.84億，稅後盈利33.8億元，2015年稅前盈利42.63億，稅後盈利35.13億，佢用計算機一㩒，大聲講：「乜港燈交稅交到17%以上㗎，壹週刊又話李生啲夥計好識財技，交稅特低嘅？」
陳太走嚟問左丁山，左丁山被逼上網睇文章，原來係壹仔楊懷康大文引述一位林智遠嘅數字，據楊生引述，長和過去五年的平均實質稅率為4%，比16.5%標準稅率低12.5個百分點，實在財技高明。究其實，香港之納稅標準，係要睇利潤來源地，香港公司如從英國或海外賺大錢，根本唔駛交香港稅，此乃稅務常識，如在香港賺錢，當然要交足香港稅，例如2015年港燈稅前利潤42.63億元，交稅7億5千萬，稅率係17.6%，何來財技可言？至於長和集團，翻查資料，整個集團除息除稅前盈利（EBIT），百分之九十五都來自海外，香港業務只佔一小部份，例如屈臣氏有700間分店，好似好多，但在全世界共有13,000間，香港分店比例只有5.4%啫，海外盈利不用在港交稅，這就是長和集團在本港交稅比較少嘅道理。