「中國梅鐸」黎瑞剛係電視廣播（TVB，511）與美克（953，現稱邵氏兄弟）嘅主要股東，佢上月增持電視廣播，最近又接連增持邵氏，唔知有乜後着嘞。
華人文化產業基金董事長黎瑞剛今年初入股邵氏後，邵氏執董樂易玲早前喺股東會後，透露傾緊電影項目，預計短期內會有一至兩個落實，但問佢黎瑞剛會否再增持公司股份，佢就冇回應。
不過聯交所資料顯示，黎瑞剛分別於上周五與本周一分別，合共增持2,600萬股，花費超過2,800萬元，持股量升至26.5%。
睇番黎瑞剛上月增持電視廣播後，大台近日播出由福將歐陽震華、滕麗名主演嘅《一屋老友記》，有不俗收視，算係近期佳作。黎瑞剛家陣增持邵氏，呢隻股會唔會都快有好消息公佈呢？