【政壹花生友】
泛民立法會議員前日見選管會主席馮驊，討論今年立會選舉新增嘅確認書問題，泛民認為呢份確認書冇法律基礎，但馮驊就話係根據《立法會條例》發出，到底邊個先至啱？花生友識條鐵咩，有泛民就話，泛民同馮驊講法都冇錯，但關鍵其實唔在於確認書係咪有法律基礎，而係作為政府官員嘅選舉主任，可以利用確認書「呢把刀」，明正言順封殺某啲人參選，全面干預選舉。
建制派反受害
馮驊話根據《立法會條例》第40條規定發出有關確認書，力撐確認書有法律基礎，另一邊廂嘅泛民，則話第40條規定參選人要擁護《基本法》同保證效忠香港特別行政區，而查實現時參選表格中，已就呢兩點要求參選人簽署聲明確認，所以單係簽提名表，已經滿足咗法例要求，所以泛民因此認為就算唔簽確認書，亦唔能夠以此作理由，指參選人提名無效，由此認定呢份確認書並無法律基礎。
之不過另一名泛民警告，魔鬼細節其實不在確認書，而係馮驊話確認參選人提名係咪有效，係由選舉主任決定。點解呢？因為選舉主任其實係政府嘅人，「佢哋會唔會以唔簽確認書為理由，宣佈某參選人提名無效？相信到時一定會問律政司嘅法律意見，而從律政司近年告抗爭人士嘅表現，估都估到律政司點做！」
所以呢位泛民花生友預期，選舉主任極有可能會否決一班港獨、本土人士參選資格，「到時呢個大炸彈，一爆就大件事」。嘩，查實唔畀本土同港獨派去選，冇得喺泛民陣營分票，花生友相信，最唔開心嘅可能係建制派喎。都係嗰句，梁振英真係會「害」人、建制派都被連累唔少！
花生友
周二、四刊出