新世界發展（017）與周大福（1929）主席鄭家純嘅太太葉美卿為區區1,200萬元，減持兩間公司嘅股票套現？
話說噚日聯交所披露權益顯示，鄭家純申報喺上周五（15日）分別減持新世界與周大福60萬股同121萬股，總共套現1,220萬元。雖然話港股最近升番唔少，地產股仲好當炒，好多隻股見一年高位，但身為主席，點都無理由減持，咁樣等於話畀市場知，你覺得股價升得差唔多啫。
新世界消息人士嘅回應都幾特別，佢斬釘截鐵話，沽貨者並非純官。而根據聯交所資料，持股人除咗純官，另外就係葉美卿，咁即係純嫂減持？發言人就話唔回應嘞。照計，純嫂要一千幾百萬使，直接問老公要都得喇，無理由沽股票，搞到要披露咁複雜，成件事認真耐人尋味。