今時今日生意難做，賣樓、賣機票都要搵型男吸睛!國泰航空（293）往時推新嘅飛機餐，通常係搵知名食肆合作，最近就搵來英國型仔名廚Daniel Green設計新菜單，主打低糖低脂㖭。
Daniel家陣既靚仔，身型又弗，原來佢曾經係肥仔一名，18歲開始，唔知係咪為追女仔，忽然發奮食得健康，成功於3年內減走65磅，仲俾模特兒公司相中，做過一段時間模特兒。
之後，佢開始喺唔同媒體主持烹飪節目，包括BBC、UK Food等等，亦寫過食譜，主張食得light之餘，又教人用低卡食材入撰。Daniel話，自己減磅至今廿年，磅數從未反彈喎。
國泰餐飲部主管卡斯頓指，由搵Daniel設計餐單，到搵同事試菜，足足有一年時間。但可惜吖，只得北美航線嘅頭等與商務艙客可以食到呢款健康餐。